കത്തിയെരിയുന്ന ഉച്ചവെയിലിനെ വക വക്കാതെ കുതിച്ചു പായുകയാണ് ട്രെയിന്‍ ,ഏഴാം നമ്പര്‍ കമ്പാര്‍ട്ട്മെന്റില്‍ വേറെയും ഉണ്ട് പലരും ,എന്‍റെ  നേരെ എതിര്‍ വശത്തെ വിന്‍ഡോ സീറ്റില്‍ രണ്ടു പുറവുമായി ഇരിക്കുന്ന ചെറുപ്പകാരായ ദമ്പതികള്‍ ,അവരുടെ കൈയില്‍ ഇരുന്നു ഉറങ്ങുന്ന പെണ്‍കുഞ്ഞിന് ,നാലോ അഞ്ചോ വയസ്സ് കാണുമായിരിക്കും എന്ന് എന്നിലെ സൂക്ഷ്മനായ അച്ഛന്‍ മനസ്സ് കണക്കു കൂട്ടി.

അവളുടെ പ്രായത്തില്‍ എനിക്കും ഉണ്ട് ഒരു മകള്‍.മൂത്ത രണ്ടു ആണ്‍കുട്ടികള്‍ക്ക് ശേഷം ഉണ്ടായ അവളെ എനിക്ക് ജീവന്‍ ആണ് ,

ഞാന്‍ വീട്ടില്‍ ഉള്ളപ്പോള്‍ ഒക്കെ അവളുടെ എല്ലാ കാര്യങ്ങളും ശ്രദ്ധിക്കുന്നത് ഞാന്‍ തന്നെ വേണമെന്ന് അവള്‍ക്കു നിര്‍ബന്തമാണ്,അഞ്ചു വയസ്സേ ആയുള്ളൂ എങ്കിലും ചില കാര്യങ്ങളില്‍ മരിച്ചുപോയ എന്‍റെ അമ്മയുടെ അത്രയും ആജ്ഞാ ശക്തിയുണ്ട് അവളുടെ സ്നേഹ നിര്‍ഭരമായ കൊഞ്ചലുകള്‍ക്ക്,

ഇടക്കേതോ സ്റേഷനില്‍ നിന്ന് കയറിയൊരു സ്ത്രീ ആ യുവതിയുടെ അടുത്തു വന്നു ഇരുന്നപ്പോള്‍ മുതല്‍ എന്‍റെ കണ്ണുകള്‍ക്ക്‌ കാഴ്ച ശിവേലിയായി ,തടിച്ച മാറിടമുള്ള സ്ത്രീകളെ നോക്കി കൊണ്ടിരിക്കാന്‍ എനിക്ക് ഇഷ്ടമാണ്. എന്തായാലും ഇന്നത്തെ യാത്ര കുശാല്‍ എന്ന് എന്നിലെ പുരുഷന്‍ കുസൃതിയോടെ ഓര്‍ത്തു.

ഇടയ്ക്കു ഉറക്കമുണര്‍ന്ന കുഞ്ഞിനെ മാറി മാറി മടിയില്‍ വച്ചും ഓമനിച്ചും അവര്‍ രണ്ടാളും കുഞ്ഞിനോടൊപ്പം ബിസ്സിയാണ് ,ആ സ്ത്രീ ആണെങ്കില്‍ ഏതോ ഒരു പുസ്തകത്തിനുള്ളില്‍ മുഖവും പൂഴ്ത്തി ഇരുപ്പാണ്.

കുറച്ചു കഴിഞ്ഞപ്പോള്‍ കുഞ്ഞ് താഴെയിറങ്ങി എന്തൊക്കെയോ കളികളില്‍ മുഴുകി വായ്തോരാതെ സംസാരിക്കാന്‍ തുടങ്ങി .മലബാര്‍ ഭാക്ഷയിലുള്ള സംസാരം.അത് കേട്ടിട്ടാവം കൈയില്‍ ഇരുന്ന പുസ്തകം അടച്ചു വച്ച് അവര്‍ കുഞ്ഞിനെ നോക്കി ചിരിച്ചു .

‘’പോടീ ‘’ കുഞ്ഞിന്‍റെ വായില്‍ നിന്ന് വീണ വാക്കുകള്‍ കേട്ട് ഞാനൊന്നു ഞെട്ടിയോ ?

എന്തായാലും അവര്‍ക്ക് ഭാക്ഷ അറിയില്ലല്ലോ എന്നോര്‍ത്ത് സമാധാനിക്കുന്നതിനിടയില്‍ കുഞ്ഞിനെ വഴക്ക് പറയുന്ന മാതാപിതാക്കളെയും ആ സ്ത്രീയെയും ഞാന്‍ ശ്രദ്ധിച്ചു നോക്കി .

അവര്‍ ബാഗില്‍ നിന്ന് ഒരു ചോക്കലേറ്റ് എടുത്തു നീട്ടിയപ്പോള്‍ അവള്‍ അത് വാങ്ങി വലിച്ചെറിയുന്നു .

അപ്പോളും വശ്യമായ ചിരിയോടെ അവളെ നോക്കി ചിരിക്കുന്ന അവരെ അച്ചന്‍റെ മടിയില്‍ ഇരുന്നു കാലുകള്‍ നീട്ടി ചവിട്ടുന്ന കുഞ്ഞിനെ നോക്കിയപ്പോള്‍  ,എന്ത് കൊണ്ടോ അപ്പോള്‍ എനിക്ക് എന്‍റെ മനസ്സില്‍ ഒരു വല്ലായ്മ പടരാന്‍ തുടങ്ങി. പെട്ടെന്ന് അവര്‍ കുനിഞ്ഞു ആ കുഞ്ഞിന്‍റെ പാദം അല്പമൊന്നു ഉയര്‍ത്തി അതില്‍ ഒരു ഉമ്മ കൊടുക്കുന്നതും അതെ നിമിഷം അച്ഛന്റെ മടിയില്‍ നിന്ന് ചാടി ഇറങ്ങിയ അവള്‍ ഓടിച്ചെന്നു അവരുടെ കഴുത്തില്‍ കെട്ടി പിടിച്ച് രണ്ടു കവിളിലും ഉമ്മ കൊടുത്തപ്പോള്‍ ആ കുഞ്ഞിനെ മാറോട് ചേര്‍ത്ത് ഉമ്മ വക്കുന്നതിനിടയില്‍ അവരുടെ കണ്ണുകള്‍ നിറഞ്ഞൊഴുകിയത് എന്തിനായിരിക്കും ?

പിന്നീടുള്ള യാത്രയില്‍ അവര്‍ രണ്ടാളും നല്ല കൂട്ടുകാരെ പോലെ കടന്നു പോയി. പാട്ട് പാടിയും ചിത്രം വരച്ചും കൈവിരലുകള്‍ എണ്ണി യും ഉമ്മകള്‍ കൈമാറിയും വളരെ നാളത്തെ പരിചയമുള്ള ,അല്ലെങ്കില്‍ വളരെ അധികം സ്നേഹമുള്ള ഒരു അമ്മയും കുഞ്ഞും എന്ന പോലെ അവര്‍. എല്ലാം നോക്കി കണ്ടും രസിച്ചും ഇരിക്കുന്ന ആ മാതാപിതാക്കളും ഞാനും !

ഇടയ്ക്കവള്‍ അച്ഛന്റെ മടിയിലും കയറിയിരുന്നു കൊഞ്ചാന്‍ തുടങ്ങി ,താടി നീട്ടി വളര്‍ത്തിയ അച്ഛന്റെ മുഖത്ത് ഉറങ്ങി കിടക്കുന്ന ഭാവം വിഷാദത്തിന്റെതാണ്, അയാളുടെ താടി പിടിച്ച് മുഖത്തോട് അടുപ്പിച്ചപ്പോള്‍  അവളുടെ ചുണ്ടുകളില്‍ ഉമ്മ വച്ചും കഴുത്തില്‍ മുഖമിട്ടു ഉരസിയും അവളെ ചിരിപ്പുക്കുന്ന അച്ഛനെ ,അവയെല്ലാം കണ്ടു നിര്‍വികാരമായ ഒരു പുഞ്ചിരിയോടെ ഇരിക്കുന്ന അമ്മയെ ഒന്ന് നോക്കിയിട്ട് അവര്‍ എഴുന്നേറ്റ് ബാത്ത്റൂമിന്‍റെ ഭാഗത്തേക്ക് പോയി ,അവര്‍ തിരിച്ചു വന്നപോഴേക്കും കുഞ്ഞിന്‍റെ അമ്മയും എഴുന്നേറ്റ് പോകുന്നത് കണ്ടു ,

ആ സമയത്ത് അവര്‍ ചുറ്റിനും ഒന്ന് നോക്കിയിട്ട് ആ ചെറുപ്പകാരനേ നോക്കി പുഞ്ചിരിച്ചപ്പോള്‍ എന്‍റെ മനസ്സില്‍ അസൂയയുടെതാണോ എന്നറിയില്ല ഒരു അസ്വസ്ഥത ,ഇത്രനേരവും അയാളുടെ ഭാര്യ ഉണ്ടായിരുന്നപ്പോള്‍ ഒന്നും അവര്‍ എന്നെയോ അയാളെയോ നോക്കി ഒന്ന് ചിരിക്കുകപോലും ചെയ്യാതിരുന്നിട്ടു ,അവള്‍ പോയ തക്കത്തിന് അയാളുമായി പുഞ്ചിരി കൈമാറിയ അവര്‍ ഒരു നല്ല സ്ത്രീയല്ലെന്നു എന്‍റെ മനസ്സ് തീരുമാനിച്ചു .എങ്കിലും അവരുടെ ആ പുഞ്ചിരിയുടെ അര്‍ത്ഥം എന്തായിരികും എന്നറിയാനുള്ള ആകാംക്ഷയോടെ ഞാന്‍ എതൊരു മലയാളിയേയും പോലെ കാതുകള്‍ കൂര്‍പ്പിച്ചു .

''സഹോദരാ എനിക്ക് നിങ്ങളോട് സംസാരിക്കണം ''

അവരുടെ വാക്കുകള്‍ കേട്ട് അയാള്‍ പുഞ്ചിരിയോടെ സമ്മതം അറിയിക്കുന്നു .

തെല്ലൊരു മൌനത്തിനു ശേഷം ഒരു ദീര്‍ഘ നിശ്വാസത്തോടെ ,അവര്‍ പറയുന്നു .

''ഞാന്‍ പറയുന്ന വാക്കുകള്‍ നിങ്ങളെ വേദനിപ്പിക്കും എന്ന് എനിക്ക് അറിയാം ചിലപ്പോള്‍ നിങ്ങള്‍ എന്നെ വഴക്കും പറഞ്ഞേക്കാം എങ്കിലും സാരമില്ല നാളെ ഒരിക്കല്‍ നിങ്ങള്‍ നേരിടേണ്ടി വരുന്ന വലിയൊരു വേദനയില്‍ നിന്ന് കരകയറാന്‍ പറ്റാതെ വിഷമിക്കാതിരിക്കാന്‍ അവയൊക്കെ ഏറ്റു വാങ്ങാന്‍ ഞാന്‍ തയാര്‍ ആണ് !

എന്‍റെ ആകാംക്ഷയ്ക്ക് അതിരുകള്‍ നഷ്ടപ്പെട്ട് തുടങ്ങിയപ്പോള്‍ ഞാന്‍ തെല്ലൊന്നു അനങ്ങിയിരുന്നു ,അപ്പോള്‍ അവര്‍ എന്നേയും കൂടി ഇടം കണ്ണിട്ടു നോക്കി കൊണ്ട് വളരെ അടക്കിയ സ്വരത്തില്‍ പറഞ്ഞു .

''കഴിയുമെങ്കില്‍ ദയവുചെയ്ത് ആ കുഞ്ഞിന്‍റെ ചുണ്ടില്‍ ചുംബിക്കരുത്‌ ''

പറഞ്ഞു തീരുമ്പോളെക്കും അവരുടെ കണ്ണുകള്‍ നിറഞ്ഞൊഴുകുന്നത് കണ്ടു ഞാന്‍ ഒന്നമ്പരന്നു . ഒരു കുഞ്ഞിന്‍റെ ജീവിതത്തിലെ  ആദ്യത്തെ തെറ്റുകള്‍ ആരംഭിക്കുന്നത് അറിഞ്ഞോ അറിയാതെയോ സ്വന്തം മാതാപിതാക്കളില്‍ നിന്നും ആണ് ,എന്ന വാക്കുകള്കൂടി പറഞ്ഞു കഴിഞ്ഞു അവര്‍ സ്വന്തം സീറ്റിലേക്ക് ചാഞ്ഞ് കണ്ണുകള്‍ ഇറുക്കിയടചപ്പോള്‍ ഞാനും എന്‍റെ മനസ്സില്‍ അവര്‍ പറഞ്ഞ വാക്കുകളെ അരക്കിട്ടുരപ്പിക്കുകയായിരുന്നു...അപ്പോളും ആ ചെറുപ്പകാരന്‍ ആ കുഞ്ഞിനെ മാറോട് ചേര്‍ത്ത് ഒന്നും മിണ്ടാനാവാതെ പകച്ചിരിക്കുന്നുണ്ടായിരുന്നു !!!